الحج لأمي
أنا كل ماروح يوماتي
أحج لقبر أمي وأزور
ألاقي طالع منه نور
يشرح صدري ويهديني
تطلع تاخدني فحضنها
تطبطب عليا
تديني جُرعه من حبها
راسي تدور
تِدَوًر في عقلي الذكريات
وأجمل حاجات وإياها عِشتها
ارجع وقلبي مليان سرور
نفسي اسكن جنبها
جارها مليونير مشهور
كان عنده عزوه وقصور
ومسكين فقير.. ناس كتير
حاكم وزير
سابوا الدنيا وغُلبها
عرايا من ثوب الغرور
جيران.. ده في حزن
وده في سرور
دنيا حقيره
بمالها وسلطانها وأهلها
كل ماعدا العمل الصالح يغور
هو الرفيق الحقيقي والمدد
هو الصحاب في الظلام والسند
حوالين الصدقه
مصيرنا بيدور
تصّدق تبقي
روحك قمر بيدور
تكون في الآخره بدر البدور
علي إيه يابن آدم
بتجري في الحياه مسعور
مهما عليت في الدنيا
نافست الجبال في الطول
خدت مكاسب ومناصب
و حبتك الغواني الحور
خللي بالك..مصيرك
جيفه تسكن القبور
زيارتك يا أمي عبره وعبر
حاجات فهمناها علي كِبر
كل اللي فات ..كان زيف وزور
