الشال …أخضر …..بقلم نبيهه علايه

الشال …أخضر
كان مازلت نذكّر
لعبة ألوان عاملة في مخيالي
مد و زجر
نسيت الي صار
و بقيت نخربش في ذاكرتي
قلت يخي الشال
فاش يعمل في شونك
و أنا معاك …؟!
يخي على شنوا معمّل …؟
يقول القايل
خليت الي صار
و بقيت شادة في الشال ؟
ماك تعرف النساء كيف تبدا تتلكّش
يخي شنوا صار …؟
قول شنوا الي ما صارش؟
راجل..و في شونو شال
أنا متَلْبش فيا الهوا…وهو يعمل هكا يلحفني بيه !
يخي على شنوا معمّل ؟
أنا بنت البحر
روحي شاعلة كيف المنارة
عرفتها المنارة ماهو؟
هذيكا الي تضوي على باب بحر
و ساعات تكون شمعة في عشقة ليل
الموج يضرب مرة في الصخر ومرات بين قبر و قبر
والقيامة تشهد!
ايه ايه …غادي
وين قتلك هيا اخطف الدورة…سيّب عليك!
و إنت باقي تحب تفهم؟
ساعات نقول
تخميرة لا ساس لا راس
جاية بين صيف و شتاء
مرة يشدّك الشهيلي و مرّة يتمكّن بيك الصرد
شنوا الي تحب تفهم ؟
هذيكا هي ..أنا
(الي يقلك بنت المهدية )
تجيبك بأم الزين الجمالية ..
تلقى روحك..متحزّب متحزّم
من فوق… للوطة
عرقك شرتلّه ..
قول شارب “الحَمرا”
متخمٍر …و مكمّل “برج الراس”
و شوف ….و شوف
كان سلٍّكتها من” عالي الأقْدار” !
ترهوجت ماهو؟
ريحتي تمكنت بيك!
ترهوجت و ماعادش فيك!
موش قتلي محلا برفانك
و قتلك سيّب عليك!
حتى انت زادة..يا راجل
جاييني وشال في شونك
بربي على شنوا معمّل ؟
ساعات نقول..
بالك تحب تغرقني في بحرك
و تخليه للموج.. يشق طريق
كل ما نتوحشك !
هذيكا منامة عتارس
الألوان لعبت لعبتها
من وقت فاضت دموعك من ليعتها
غرقت…في موجتي ،
عرقك شرتلّه…
الشال في شونك
وأنا من الغبينة …
دبوزة برفاني …فرغتها فيه و فيك
ترهوجت ماهو؟ موش قتلك سيّب عليك ؟
بربي على شنوا معمّل؟
راجع متغرّب…
الألوان لعبت لعبتها
الشال… في شونك
و ريحتي تمكنت بيك .
قلي…على شنوا معمّل ؟!