من مدة مسافر للقاهرة..
لأول مرة التكييف- علي غير العادة- شغال..
واحد من اخر القطر نادي رئيس القطر :
_التكييف عالي ..لو سمحت وطيه..
بعد شوية صرخ آخر :
_الدنيا حر..فين رئيس القطر..
طول الرحلة خناقات بين انصار : علو التكييف ..ووطي التكييف..
علي الكرسي المجاور .. سائحة اجنبية ..بسكوته رقيقة ..بجوار شاب رفيق رحلتها..
اخرجت من حقيبتها الهاند باك الصغيرة ..بلوزة صوفية خفيفة ارتدتها ..سدادات اذن ..عصابة سوداء علي عينيها ..وسادة صغيرة حول الرقبة ..
استسلمت للنوم في أحضان صديقها في سلام..
اصدقائي الديمقراطيين جدا:
نوطي التكييف ولا نعليه. ..
الإسلام هو الحل ولا..عبدالناصر هو الحل..ولا العاصمة الادارية الجديدة هي الحل ؟؟!!
ربنا يحل وسطكم جميعا..
الحب هو الحل..
ملحوظات غير مهمة:
دورات المياه قذرة_ الفئران تمرح في جنبات القطار_ تاخير ساعتين في محطة الركوب_٤ ساعات تاخير في محطة الوصول..لااحد يتكلم !!!!!
_ المشكلة رئيس القطر مؤدب..لو قليل ادب كان زعق وحسم الموضوع من الاول او قفل التكييف وقال:التكييف عطلان واللي مش عاجبه يخبط دماغه في اقرب حيط !!!!
_ المعجزة: واحد اخر القطر بيتخانق ويأشر علي الراكبة الاجنبية محذرا من العدوان الغاشم علي تقاليدنا وعاداتنا !!
