شعريّة الحلم حلم .. على الطريقة المغربية …… بقلم // رضا لمريني // المغرب

شعريّة الحلم
حلم .. على الطريقة المغربية
.
بِينْ الزْحام بانْ لي .. يا اخْواني
أغْزالْ امْليحْ .. يا نورْ اعْياني
لَوْجَهْ بَدْرْ وَضّاح .. فَيَّقْ ابْطاني
جابْ لي التْمام .. الزّينْ اغْواني
خَفْتو ايْضيعْ بِينْ الناس .. أُو يْوَلّي بَرّاني
غابْ الرْقيبْ .. أُو احْضَرْ شَيْطاني
يَنْعَلْ بو الحَشْمَه .. أُو الخُوف الدّخْلاني
..
يَتْمَشّى بَالمْهَلْ .. كِ اقْضيبْ البانْ
قَدَّ امْخَطَّطْ .. أَيْهَضَّرْ اللّسان
أسْدَرْ امْشَقَّقْ .. كأنّو بِينْ الويدان
الْفُمْ مَنْظومْ .. ابْحالْ اعْقيقْ الْمُرجانْ
لَعْيونْ كحْله .. تروي العطْشان
لَخْدودْ وَرْدْ .. نايَمْ بِينْ الأقْحوان
أُو حْروفْ الزّينْ اتْنادي .. عْلى كُلْ ولْهان
..
اتْوَكَّلْتْ ازْعَمْتْ .. أو قَرّبْتْ
عْلى اسْمِيْتْها فْ الْحينْ .. سَوَّلْتْ
ڭالتْ لِيَ : اسْمهانْ .. أُو ابْتَسْمَتْ
بانْ اعْلِيَ لَعْجَبْ .. أو ردّيتْ :
لَوْنيسَه ڭُلْ لِي اهْنا .. ماشي غيرْ فْ ڨيينا يا لَخْواتْ
الشّمْس مازالْ طالْعَه أُو فينو اللّيلْ !؟ .. جَوْباتْ
اعْليَ زَرْباتْ
أُو قصْدي فَهْمَاتْ
اقْريبْ مانو ابْعيدْ أَ الزّينْ .. جاوَبتْ
حتى النهار عَنْدو حقّو ..أُو هيَ ضاحْكَه .. ڭالتْ
راكْ بايَنْ زَهْواني !؟ .. زادَتْ
..
أمْصَمّمْ نَبْلَغْ مُرادي
ردّيت عْليها : آهْ عْليك يا اسْمهاني
أزْهّو مْعَ لَحْمامْ مانو عيبْ راكِ عَجْبَني
أُو الشّوفْ ما ايْبَرّدْ الْجوف يا المْدَوْخاني
اسْلَبْتِ عَقلي أُو وَلاّ اكْلامي برّاني ( … )
( لْحَدْ اهْنا ضَرْبتْني الْفيقَه أُو لْقيتْ راسي حالَم نَتْحَرّشْ
بْ زينْ ابْناتْ ابْلادي )ـ