قلبوا الهرم والقاعدة صبحت فوق
نوم اللئام ف الخص بيخوف ..!!
تفرد جناحك كله حب وشوق
يطلع عليك الكره يتشوف ..!!
قنديل طفاه الليل بقلة ذوق
“شق” الفلاتى طريقة وإتصوف ..!!
والمجد للى بيصنعوا التوابيت ..
لحظة مخاض الفرحة ف قلوبنا ..!!
وبيؤدونا محبة ف الطواغيت ..
ويفرفطوا بالجهل ف ذنوبنا ..!!
المجد للى يبيع حيطان البيت
علشان يدارى ف رقعة من توبنا ..!!
المجد للى معاه كعوب يلعب
وف كل مرة يخشها ب رهان ..!!
عافر بكلمة حق راح تتعب
وتلاقى باطل عنده 100 برهان ..!!
أس البلاوى ف وسطها “الملعب”
والطبالين والخونة والخرفان ..!!
هب النسيم داعب شعور البنت
فتحت عنيها وفجأة شافت نور ..!!
نادى المنادى ف كل حتة أمنت
قامت مداين قلبها بتثور ..!!
العتمة قالت بس انا إتمكنت
خبت حبيبها ف قلبها المكسور ..!!
طلع الجراد م الأرض حلق حوش
يقطف ف ورد ويحرق الزرعة ..!!
والنخل عالى والجربد محشوش
والكل خايف حتى م الطلعة ..!!
غمضت عينك شوفت حلم فاشوش ..!!
فانكوش ومنجل حشوا ف المرعى ..!!
