من اجمل المشاهد فى مسرحيه المتزوجون وتقريبا لم يفشل فى اى مره اشاهده انى اضحك وكأنى اشاهده للمره الاولى
سؤال عبقرى بيظهر شخصيه المثقف والجاهل لو الاتنين وقفو قصاد بعض داخل دائره انتخابيه وبيتكلمو فى السياسه
= تعرف ايه عن سياسه الوفاق يا واد يا مزيكا؟!!
– اعرف انك توفق راسين فى الحلال ياسى حنفى
طبعا لادى سياسه الوفاق ولا هى اصلا سياسه ..بس علشان بقت مهنه وشغلانه اللى ملهوش شغلانه بقينا نشوف سياسيين كتير ومعظمهم بعد ما يتشهر انه سياسى
على طول نلاقيه بدأ يضيف لنفسه مهنه جديده
وهى المحلل السياسى….وتبقى محتار من رؤيه هذا السياسى
وقدرته العظيمه على خلق جو سياسى خاص بيه لوحده
واهى كلها لعبه سياسه..
من ضمن الالعاب السياسيه الجديده اللى كلنا بنعيش اجوائها
إنشاء غرفه اخرى للبرلمان المصرى عن طريق مايسمى مجلس الشيوخ واللى برضو كنا عارفينه تحت اسم مجلس الشورى …وحسب التعديلات الدستوريه يلزمنا بإنشاء البرلمان ذو الغرفتين…
الغريب وانت بتحاول تنشئ غرفه اخرى للبرلمان المفروض انها تكون لها اتجاه وشكل مختلف واعضاء مختلفين عن الغرفه الاولى …بتلاقى نفسك على موعد مع نفس الاحزاب السياسيه الموجوده فى الغرفه الاولى ونفس الوجوه ومش بس كده دا كمان نازلين بقوائم ..يعنى الفكر والتوجه الموجود فى الغرفه الاولى هو نفس الفكر اللى حنشوفه فى الغرفه التانيه….دا طبعا غير اسماء رجال اعمال هم امتداد للحزب القديم إياه اللى كان بينجح بنسبه 99% فى البرلمان
نفس الاحزاب ونفس الوجوه ونفس اسلوب الدعايه
يعنى مافيش حتى الابتكار فى الدعايه الانتخابيه ..
دور مجلس الشيوخ معروف وكلنا فاهمين كويس اوى معنى وجوده ولكن بالشكل اللى بنشوفه الان لن يقدم أى شئ لا للمواطن ولا للدوله …خصوصا ان فى قوانين كانت بمثابه
الحياه بالنسبه للمواطن وللاسف لم يناقشها البرلمان الحالى طول فتره انعقاده وتسويف وتطويل من برلمان الشعب اللى المفروض بيناقش قضايا الشعب ….
بالمناسبه فى مثل شعبى بيفكرنى بحالنا مع غرفتين البرلمان
المثل بيقول حنحط عيشه على ام الخير
واعتقد احنا لا حنستحمل عيشه ولا حنطيق ام الخير
انا لا حقول نقاطع او ننزل ونشارك..
انا عن نفسى ح…….
