من كتر قساوتك على قلبى
مش عارف أعيش
ده انا ياما حلمت تكون جنبى
وفتحت عيون العمر عليك
وواربت الشيش
ولد درويش
ومهاجر
ف ملكوت الغرام سواح
لا كان ع البر بيسلم
ولا ف الموج عشقت براح
مانيش مرتاح
وبتطوح
مابين الآه والتسابيح
ولو طال البعاد بينا
أعلق لهفتى نسمه
على أبواب المدد والريح
وأنا ف عشقى يا خلق صريح
ومتلخبط
قصاد عينك
يا أحلى ملاك
وبستناك
تصالحنى وتفتحلى
مابين البين وتفرحنى
أعود مشتاق ولا أفكر
خصامك يوم ده يوجعنى
ياريت قلبك يرجعنى
على شطك
ويرسم بالهوى حواديت
أنا ب الجمر بتوضى
وألملم دمعتى أتغطى
بشوق وحنين
ولد مسكين
بيرمى عيونه ع السكه
ويتدارى بقلب حزين
ومين هيحنن القسوه
هنا ف قلبك
على كفى
تطبطبلى
تطيبلى
آهات الصبر لو تسمع
ده أنا من كتر أوجاعى
مانيش عارف لحالى أعيش
