ابراهيم سعفان

ابراهيم سعفان واحد من اهم الكوميديانات اللى جم فى تاريخ السينما المصرية.. لدرجة انه مكنش بيبذل أى مجهود علشان يقدر يضحكك…
عم ابراهيم اتولد فى شبين الكوم سنة 1924.. وبعد ما خد البكالوريا دخل كلية الشريعة بناء على رغبة والده اللى كان شايف فيه مشروع عالم كبير..
بعد ما اتخرج من الكلية اشتغل مدرس لغة عربية.. لكن فجأة حس أن حب الفن جواه بيزقه زق لسكة التمثيل .. طيب يعمل إيه وإزاى هيقدر يقنع ابوه بأنه يكمل فى الطريق ده ويسيب الطريق اللى ابوه اختاره.. فضل يفكر ويفكر لحد ما القدر تدخل وحسم الموضوع كله بموت الأب.
بعدها ابراهيم سعفان بدأ يركز أكتر فى التمثيل ودخل معهد التمثيل وتفوق فيه.. وبناء عليه بقى مطلوب فى اكتر من فرقة مسرحية.. ولما نجح فى المسرح اتطلب فى التلفزيون وكلها للاسف ادوار صغيرة اقل من حجم موهبته.. يكفى تعرف ان سعاد حسنى لما جات تدخل الوسط وتعمل اول فيلم بطولة لها “حسن ونعمية” جابوا عم ابراهيم علشان يعلمها الالقاء ..
من اكتر المآسي اللى عاشها عم ابراهيم فى حياته موت 4 من ولاده ورا بعض.. وقال ابنه خالد عن الواقعة دى فى تصريحات لجريدة الوطن : لم يكن يتدخل في أمور المنزل وترك تصريفها وإدارتها وتربية الأبناء للوالدة، وكان مشغولا بفنه وعمله فقط، وتزوجا سنة 1953، وكانت جارته في المنزل في شبرا.. ورزقا في بداية زواجهما ببنت وثلاثة أبناء ماتوا خلال أول أربع سنوات من الزواج، بسبب الجفاف، وسبب هذا حزنا كبيرا لديهما، «كانوا بيتعالجوا غلط، وفيه أطفال كتير ماتوا في الخمسينات، لحد ولادة أختي الكبيرة سنة 1959، وأنا وراها لحد مبقينا 5 أبناء، 3 ذكور وبنتين».
عم إبراهيم فى البيت كان على عكس الصورة اللى بتشوفوها فى التلفزيون.. كان جاد جدا..
عم إبراهيم كان طيب جدا ومحترم جدا لدرجة أنه وهو بيسلم على اي حد.. كبير أو صغير كان لازم ينحني..
عم إبراهيم اتوفى في 1982 في عجمان بسبب أزمة قلبية حادة.. لكن لسه تأثيره وتأثير أعماله باقي لحد النهارده وهيبقي لسنين كتير قدام..