في يدّي عصا العزّ
وفي عيني ألف معنى
قالوا الزمان يكسّر
قلت.. أنا ما نتهدّش
قالوا الطّريق طويل
قلت..نمشي وما نحبّسش
أنا بنت الأرض
والرّيح تعرف خطوتي
والجرح علّمني نكتب بالنّار كلمتي
ما نيش ضحيّة أنا حكاية ثورة
وإذا قالولي:
واش بقى لك؟
نقول:
بقاتلي روحي
وبقاتلي كلمتي
وبقاتلي كرامتي
وبقّاتني أنا
وإذا قالولي:
وشكون انتي؟
نرفع راسي
نشدّ العصا
ونشوف للبعيد ونقول:
أنا بنت الأرض والرّيح تعرفني
أنا بنت الوجع والنّار ربّاتني
أنا بنت الجزائر والحرّة سمّاتني
أنا امرا
كلّ ما قالوا كملتْ
رجعت أقوى
وكتبت:
أنا ما نطيحش
وإذا طحت.. أنّوض واقفة
وإذا انكسرت..نرجع سيف
وإذا سكتُّ
اعرفوا أنّه في صدري قصيدة
تستنّى غير وقتها باش تولّي زلزال..
