من ديوان:
“جوابين لحراجي القط وحبّة تناتيش”
الدمعة ال13
ما غبتش يوم ف مدرستك
وطول عمري وأنا ب احضَر
وحبّيتك وأنا عيّل وبيطَرطَر
وحبّيتك وأنا راجل بيتأمّع ويتغندر
ومنْ سقراط لِشُو اسمه.. الولا سارتر
راهنت عليكِ يا مْنَاكفة
وطول عمري وأنا ب اخسر
ما خدتّش بالي
أنا الهَدَفا الّي بيحبّك على طُولُه
ما كُتِّش شايف المنظر
لقيتك أُوزَعا يا بلادي
وعايزاني أكون أقصَر
أنا مش نبّة يا بلادي
أنا الزعزوعة من فوقي
وجدري مصنع السّكّر
أنا التّرزي
يا أفِكّ الرّفية منْ توبك
يا مش ح العب ولا عمري راح أتمزغر
يا مش عبلة ومش عايزا …
أنا عنتر
السيد فرج الشقوير
