الجمعيه العموميه للاهلي بقياده الفيل تطالب الخطيب بالاستقاله

كتب خليل ابو العلا
علي صفحته بالفيس بوك كتب دكتور وليد الفيل
عضو مجلس اداره النادي السابق وعضو الجمعية العمومية بالاهلي عبر الفيس بوك
موجها حديثه الي الخطيب ومجلسه (استقيلوا يرحمكم الله !!!!!!!!!!!!

عزيزى الكابتن / محمود الخطيب
■ على هذه الصفحة كتبت لك مرات ومرات قدمت لك فيها النصيحة المخلصة وحاولت انى أنبّهك إلى أخطاء وقصور لا تخطئه العين
■ لكن ..(ومع الاسف الشديد) لم تستمع وتفرغت اللجان لامطارنا بالبذاءات واتهامنا بالسعى لاسقاطكم وهدم الأهلى وغيرها من التهم المعلبة سابقة التجهيز
■ والنهاردة ياكابتن مابقاش الصمت ممكن وسكوتنا هو خذلان للأهلى و خيانة لحاضره ومستقبله

■ ياكابتن : اتوفرت لكم كل عوامل النجاح كيان اسمه يجلب المليارات وقائمة كاملة اخترتها على كيفك ونجحتها بالتزكية وسيطرة تامة على السوشيال ميديا من خلال صفحات ممولةولجان اليكترونية شغالة (ليل نهار) فى شتيمة أى حد ينتقدكم وقناة برامجها موجهة لتغييب العقول ممكن تقولى ازاى كل العوامل دى ممكن تتوفر لمجلس ويفشل؟؟؟؟

■ قسمت النادى لفريقين متناحرين واعتمدتم على أهل الثقة بدل أهل الخبرة وقصرت كل المناصب على أصحاب الولاء من أفراد حملتك الانتخابية التى اتحولت الى عائلة الأهلى و بالتالى دفع الأهلى – ولايزال – ثمن فادح لسيادة فكرة مؤسسة المكافآت لا مؤسسة الكفاءات

■ استهنتم بعقول الأعضاء وبدل تحقيق انجاز حقيقى اعتمدتم على الشاشات العملاقة والشو والعروض المبهرة اللى بتركز على الشكل وتخلو من المضمون وتفرغتم للصور السيلفى وكأنكم فى رحلة ترفيهية بتوثقوا لحظاتها

■ ضيعتوا موارد النادى فى صفقات فاشلة وشروط جزائية لمدربين ومرتبات للاعبين على ذمة أندية أخرى وتعيينات على سبيل المجاملة ولجأتم للاقتراض وفتح أبواب العضوية لأى حد يدفع وتحميل الأعضاء بأعباء مالية ضخمة فى الاشتراكات ورسوم مدارس الألعاب وأسعار المطاعم والمنافذ المبالغ فيها ودورتم في دفاتركم القديمة عشان تطالبوا الأعضاء بمبالغ وهمية تحت مسمى القيمة المضافة وغيرها

■ صدرتوا الجمهور عشان يحارب معارككم وسبتوه يسجن ويتهان ويضيع مستقبله دفاعا عن مجلسكم الموقر وأقنعه اعلامكم وصفحاتكم بنظرية المؤامرة والضغوط الخارجية لتبرير الفشل والتعتيم على الاخفاق

■ فرطتوا فى حقوق الأهلى فى مواقف كتير فخسر بطولات وخسر معها مبادىء عشنا عمرنا كله نفتخر بيها وضاعت هيبته بعد مابقى مستباح لكل اللى عايز يصفى حساباته معاه وأصبح كيان هش لا بيخوف منافس ولا بيسر حبيب

■ أعلنت قبل الانتخابات أنك حا ترحل مكتفيا بما قدمته فامتدحنا قرارك ووصفنا توقيته بأنه توقيت عبقرى وأنه خروج من الباب العالى وبعدها بكام يوم نكتشف اننا كنا ضحية لسيناريو ركيك دفعك له المنتفعون من وجودك ولقينا سيادتك بتتراجع بحجة الراجل اللى علق يافطة على البلكونة

■ تجاهلت انفلات اللاعبين واستياء الأعضاء وصرخات العمال ورحت تدورعلى تنمية المجتمع فى لقطة سخيفة وممجوجة

■ جبت لنا اللى سب رموز النادى وسب أمهاتنا ونصحناك ساعتها لكنك كالعادة ماسمعتش طب اكتفيت بكدة ؟؟؟؟؟ لأ ده انت رحت اشتريت زمايله اللى كانوا بيشتمونا معاه عشان تكمل الكورال

■ فى عهدك السوشيال ميديا هى اللى بقت بتحكم النادى ورحنا نجرى ورا صفقات كيد النسا اللى جت ومعاها خراب غرفة اللبس نتيجة التفاوت الرهيب فى العقود

■ فى عهدك زاد الظلم على العمال والموظفين لحد ما مات منهم ناس مقهورين واللى فضلواعايشين بيحسبنوا وبيدعوا ان الفرقة تخسر

■ شخصنت النادى فبقى الأهلى هو أنت وأنت بس وحاولت كتابة تاريخ جديد يبدأ من عندك وينتهى عندك وحولته الى عزبة خاصة تدار بالأمر المباشر

■ اتسمت فترتكم بالعشوائية والتردد والانقلاب على المبادىء وكانت عبارة عن سلسلة من الأخطاء المتكررة اللى كل مرة كنتوا بتنتظروا فيها نتيجة مختلفةرغم تكرار نفس التصرفات فى نفس الظروف وأدرتم الصرح العملاق بنظرية حزلقوم (ما يمكن تظبط المرة دى)

■ خلافنا معكم ماينفعش نختزله فى خسارة مباراة أو ضياع بطولة لكنه خلاف مبدئى وأساسى يتعلق باهدار كبرياء الأهلى والانتقاص من مكانته وطمس هويته

■ هى مرحلة أتمنى أن يسقطها التاريخ اتهدمت فيها الثوابت واغتيلت فيها مبادىء الأهلى بفعل فاعل فبقى مسخ مانعرفوش لكن – وللأسف – التاريخ مابيقدمش استثناءات لحد

■ عزيزى الكابتن / محمود
عارف انه قرار صعب لكن مايحتملش التردد ولا التسويف بالاضافة أنه حايبقى صعب المرة دى تقديم كبش فداء جديد والأزمة مش حايحلها بيان انشائى هدفه امتصاص الغضب لأن ببساطة مفيش حد عاقل ممكن ينتظر الحل من ناس همة نفسهم جزء من المشكلة والخطيب الرئيس كتير سحب كتير من رصيد الخطيب الاسطورة والهمهمات التى كانت بتتقال همس اتحولت الى أصوات صاخبة بتطالب بالرحيل

■ ولكن حق الله انك ماتشيلش المسئولية لوحدك بحجة أنك مفوض من المجلس لأن فيه مجلس شاركك فى القرارات اما (بالموافقة) أو بالصمت (وعدم الاعتراض) وبالتالى فهو مسئول معاك على اللى وصل له حال الأهلى

■ عشان كدة خليها بارادتك وبقرارك قبل ماتفرض عليك اقنع مجلسك بالرحيل .. البيان مش حايشفع و التاريخ مش حايرحم واللجان مش حاتنقذ حد من الغضب

■ياكابتن :
استقيلوا يرحمكم الله !!!!!!!!!!!!