بلتفت لِك بإنتباه الراس
وشايف لِك ايد في السما مرسومة
مهما كنت قدام الناس
هتفضل صورتك في قلبي مضمومة
ومشيت كتير لحد ما وصلت
وقابلت بنت هي بروحها أكتر من بنت
بنت جميلة بنت رقيقة
بنت عنيدة وبنت بريئة
بنت تسهر منها الشمس
بنت تخلق فراشات باللمس
كل البنات موديلات
مكياچ وتجميل كوافير
ومونتاج وتعديل مونتير
إنما انتي يا حبيبتي
حُسن خُلقِك يُطِلق في سماكِ الطير
وبينما الليل شامخ
وناس كتير نايمين
فيه أزواج من الانسان
بيتمشوا اتنين اتنين
والله ماكنت أعرف أنا هنا ليه
غير إن حُسن القدر خلاني أشوف عينيه
لولا سؤالِك عن الوقت
ماكانش الخدين مبتسمين دلوقت
طيف ريحتك بيفرَّق على القلوب الورد
على جنبين السيما
وقلبي اتشد لخَد غمازته زي الشهد
ووجودك الي بيعمل للمكان قيمة
فاكرة أول مرة شوفتك فيها
كان الكون واقف مستني
أقول انتي الحياة الي هكمل بيها
ولا أنا الي اتلخبطت في بنت صوتها بيغني
جيتي فجأة كأنك جزء من المكان
جيتي بهدوء كأن الجمال عارف العنوان
وانتي شايفاني وسألاني
في الحقيقة كنتي عاجباني
وكأني في الدنيا انسان بيتولد تاني
سكوتك كان تام
ونظراتك مليانة كلام
وكأنك مش بتسألي على الوقت
إنما على حياة تانية لقدام
إزاي اللحظة معاكي غريبة
اتخطفت من لون عيونك
ولما قلبي بلساني نطق قولت “يا الحبيبة
الدنيا بتتحرك بغمز رموشك”
والله ماكنت أعرف انتي مين
بس سيبتي على قلبي ختم حنين
من يوم ما شوفتك
اتولد للدنيا أجمل جوز مجانين
وأصبح تنهيدك الي كان هوا عابر
سلطان على حركة أنفاسي وآمر
وبستقوى بيكي وبتتشد عيداني
حتى صوتك الناعم مش قليل
عشان أحافظ على هدوءه مش بميِّل
وطالما انتي بتحبيني يبقا الدنيا كلها حباني
صدفة لقاء البصيرة بالنور
ما أحلاها الصدفة دي
حضورك غير أي حضور
مجيئك يعني الحياة بتبتدي
تبدأ الأيام ولا يبدأ الوقت إنه يمرّْ
وياكي أنا انسان سجين في حبك وطير عايش حُر
هتبدأ لحظة ميعاد مقابلة
وتقفيل كتاب ومسكة ايدها
وخجلًا تداري خدودها
وقلبها مليان كلام متحاش
وأسمع صوتها عُصفور الصباح
وعمري ماصدقت إن اتنين يحسوا بنفس الحالة
إنما أهو شعور متعاش
مين كان يصدق حد عاش حياته بيدور
ولما أجرب أتصور نخبط في الصدفة ونتهور
ونبدأ الي غيرنا خايف منه
حكاية نكملها
نلاقي حاضن جروح نأمنله
ولمسة أمان حابينها
صدفة لقاء البصيرة بالنور
ما أحلاها الصدفة دي
حضورك غير أي حضور
مجيئك يعني الحياة بتبتدي
لقاء الفراشة في نفس المكان
كأن الجمال عارف العنوان
