كتاب وشعراء
يا أغلى حد جوايا….بقلم محمود يونس
يا أغلى حد جوايا
قصاد عينى ووحشانى
كتير وخدانى من نفسى
وجوا عنيكى سيبانى
وادينى غرقت جواهم
ومش عارف أعود تانى
ونسيانى
برغم الحب والحيره
بشوف ف عنيكى تكشيره
معايا وبس تكشيرتك
وأنا اللى لما تيجى سيرتك
يعيش قلبى مع السيره
تاخدنى اللهفه والغيره
وأروح لبعيد
واتوه عن نفسى والعالم
بقيت أتمنى لو أبقى
بقلب حديد
بقيت أتمنى لو قلبى بدون إحساس
بقيت اتمنى أكون وحدى
وأنسى الناس
وينسونى
واعيش على ذكرى وجعانى
ويكفينى
تكونى دمعه فى عيونى
