بتكلم مين..شعر: كمال سنوسي

بتكلم مين..
والكراسى فاضية .. خاوية
واللى باقى فى ركن زاوية
والجميع خلاص انصراف
لسه بتعرض الحكاية..
فوق خشبة مسرحك .. ثابت مكانك مطرحك
وأنت يا صاحبي مش متشاف
أنت فى عيون المراية ..
شىء مجرد .. من كل شىء
بلا ملامح.. بلا أوصاف
ع القهوة قاعد ومظبط مظاهرك
لوحدك بتلعب وبترمى زهرك
تخسر .. تصمم تكمل فى سهرك
تنكر فى حزنك ..
والقهوة السادة اعتراف
بتكلم مين ..
وأنت على غلاف المجلة ..
عنوانك السكوت
جوه الصفحات مقالتك
بكرة الأيام تفوت ..
تكتب.. وتكدب وتكتب
ترمى بعيد الحروف.. وتقطع الغلاف
جاهز .. تحضر شنطتك
خريطة تايهة مرسوم فيها خطوتك
شريط أغانى.. وكل غنوة
كانت بأسم محطتك..
وهدوم تدارى هموم .. وتوب للوجع شفاف
بتكلم مين ..
صوتك المبحوح .. للسمع مش واصل
رجع الصدى مجروح ..
أنت مش مسموح .. بحر الجفا فاصل
تجمع زمانك .. تطرح امانك..
ولا أى شىء حاصل
تقسم حنانك .. تضرب مخاوفك
ولا شيء معاك فارق..
شوف بقى لما الخوف يخاف..
شعر: كمال سنوسى