- شيطان الحلم
- عفروتو بيوزع نار
جوه الدار
ويتمشى
يدق الباب على خطيه
ومنسيه
ف حوارى حلم أمنيه
ويقطع ف أوصافها
تخطى فوق مدى روحنا
تقسينا ترسينا
تزود ف الهوى جروحنا
تِبَكينا
وتعصر مُر ليالينا
وتسقينا
كاسات الجمر من طيفها
وكان لينا فين يا دنيتنا
لا سبتينا بنتهنى بحبايبنا
ولا ف الحلم فايتانا لأي قرار
وعفروتو يوزع نار
- بتعرف غنوه تشبهنى
من زمن فايت
وتعرف صوره تلمحنى
ف غرام بايت
وتعرف صوتى وملامحى
ل ضي العمر فوق قمحى
عيدان من نور
ومبدوره
على السكه
مابين كوشه ومنصوبه
وبين صبرى على بُعدك
أشوف الزفه مكسوره
ف قلب حنينك الخداع
وقولى صحيح
ده مين النوبه بيخلصلى منك تار
وعفروتو يوزع نار
- وأصدق ضحكه عشناها أنا وانت
ماهيش لينا
على مانيكان بيتدارى
ف توب أبيض ل بنوته
بتعرف صدق عشاقها
كتير حاولت تلمحلى بطرف التوب
يا حلوه فيك عشم زايد
ده حبيبك ماهو صريح
وكنت أبادلها ضحكايه
تكيد ف بنات
وأقول عنك كده غيرهم
أكيد حسدونى لما شافوك بتعشقنى
وتضم هوايا نسمة شوق
على جبين الحياه بإصرار
وعفروتو يوزع نار
- شيطان الحلم متجلى
إلهى تتحرق بالشوق
لو ما بعدت يوم عنى
أنا خداع لكنى رجعت
أبوس يد الهوى رحمه
تعبت كتير واهو إتوجعت
دى تبقى الحلوه بتسامح
وانت تعيش ف دور جلاد
بنتعاهد على فرحه
تقوم انت قالبها حداد
شيطااان الحلم ياااا عفريت
أنا ف الذنب بكتبلك كتير أعذار
وعفروتو يوزع نار
