- شوفت الكمانجا بتتكلٌم
بتقول حاجات
اريّح من اللّي بتبقا عايزهُ من السكات
صوتها الحزين ..
حرّك حنين
وحاجات ف قلبك مركونين ..
من ييجي كَبشه من السنين
نَفَض التُراب من فوقها خلّاك تبتسم
والعنكبوت .. لَم الخيوط
قرّر يعزّل من هنا
وماصانش عِشره و جِه سلٍّم
- شوفت الكمانجا بتتكلم
بتدلّعك .. وترقّصك
بتكمّل اللّي بينقَصك
وتقول حاجات وقت الفرَح ..
مالهاش كلام ينفع ليها
زي امّا بتحس بحاجه ..
بتسيب دموعك تحكيها
احسن ما قلبك يتألم
- شوفت الكمانجا بتتكلم
بتقول بحبك
انت فين !؟
بتهز قلب
بتبل عين
بتضُم وتشبّك ايدين
وتودّي ناس من فين لفين
وتسيبنا نعشق ونجازِف
يابخت كل اللي اتربّي ..
من صغره انّه يكون عازِف
- و يابخت كل اللّي اتعلّم ..
يفهم كمانجا بتتكلم !!
