رحيل الشمس
ـــــــ
الشمس غابت
والدروب مدَّمْدِمة
والضل شارد
والقلوب متعتِّمة
كل قلب فايتة فيه
مِنكْ شُعاع
حُزنك وفارد فى القلوب
مليون شراع
سرقوا الوداع
سَرقوا النهاية م الحكاية
قبل الأوان
ياكون جبان
انطق وقول إنك جبان
إنك فساد
إنك سواد
وان الحقيقة اللى
ف رموش الغيم وجع
لأ مش حقيقة
ولا ده وجع
دى بذور وشقت
فى المكان الوان فزع
ياأرض شابت بالسواقى
وشاب نخيلك
ملعون ضميرك
مطحون يا جهل فِ الرحاية
والطحـــين
مرصوص عجين
معجون بسوس
جهلك غموس
مسموم بيقتل
ف الشموس
والشمس غابت
والدروب مدَّمدِمة
والضل شارد
والقلوب متعتمة
مـــات الربـــيع
ب إيدين وضيع
ف بـلاد ضـــياع
يا بـلاد ضــــياع
