الجمعة , مارس 5 2021

يا مصر يا ساكنة جوه القلب و الننى….قصيده للشاعره دعاء عبد الوهاب

يا مصر يا ساكنة جوه القلب و الننى
أنا زعلان أوى اكمنى
بقالى كتير مبفرحشى
و غير العتمة مبشوفشى
و بعد ما كنت بادعيلِك
بقيت بادعى … يارب اَمشـى !!
يا ناكرة صوتى و وجودى
و فاكرة بس لون دمى
و كل ما اقول هتتعدِّل
تزيدى هموم على همى
و انادى يا مصر حرية
يشدوا قيودى ف ايديا
يا مظلومة و ظالمانى
أنا المقتول و انا الجانى
أنا اللى ف وسط ألحانى
تبات الدمعة مروية !!
يا مصر يا قِبلة الساكتين
و ناس باشت ملامحهم
ورا كل البيبان واقفين
لكن ضاعت مفاتيحهم
من النور و النهار خايفين
على الزيف و الوجع قادرين
يا صوت لحظة
و صمت سنين
يطبطب ع اللى دابحهم !!
أنا اللى ما كنت يوم واحد
من الطامعين و لا الأتباع
أنا اللى هتفت … قالوا اسكُت
و لما صبرت .. قالوا دا باع !
أنا المجنى عليه دوماً
أنا العايش يادوب اسماً
أنا اللى باموت و اكون رقماً
بلا عنوان و لا ديَّــة !!!

 
 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: