على قزاز الزمن من برة
باكتبلك بلون أيامى
حبة شعر من روحى
و تشكيل الحروف
آهاتى و التنهيد
و فوق قبة سما الأحلام
رسمتك نور
و مستنى يجينى الدور
و ألون رسمتك بالعيد
ما تبقيش الرزاز
فى الجو لو ماطر
و تمحى حروف فـ أشعارى
و لا تكونى الرياح
لو شايلة فـ الخماسين
رمال قاسيين
تقطَّع منى أوتارى
و حاولى تكونى نسمة صيف
فـ ليل حالم بشط البحر
أو قارب خشب ع البر
نفسه يكون لُقا العاشقين
و يتمايل غرام فـ النهر
أو كونى
يادوب ومضة أمل بارق
لأحلام البشر سارق
و بيمنى الصبور منهم
بجايزة صبر ،، لسة بعيد
على قزاز الزمن من برة باكتبلك
،،، و تانى هاعيد