.
.غامض الروح
يا مُعٓذٓب
خٓافٍض النوح
يا خلاسي
أنت يا الشوقك مُهذب
ساند البوح
في الكراسي
فاتح الشوق والزراير
شفتنة
وأنت من جوة
بتقاسي
في عيونك صاحية دمعة
والخطاوي الرايحة هسه
في احتدامات
الرحيل
هيجت شوق المراسي
للبنات السافرن
في فضاءآت الحلم
في بعادن فتشن
ليك النهارات
ورتبن عندك حضورن
ولونن ليك الاماسي
وشاغلنك بالعشق
واتسللن
أتوهطن عشب النبض
وما قفلن فيك التمني
ولا بكن لحظات
غيابن بالسنين
ولا لقيت دونن نديم
ولا. بقن وبوراك وطن
يمشي ويغالط
في الحنين
وأنت تائه في عيونن
ماسك الفرح
الأساسي
دهشه الوجع القديم
لهفة الريد البواسي
وانتو ساكنين بين جداول
صاحية بيكم
وصادحة فيكم
جوة في سلام البساتين
البساتين
البنات ألفي الفساتين
المطرزة بالعصافير والثمار
فسحة الروح
في النهار
تغسل الهم والقلق
الفي دواخلك معتلج
رشحت ليك الرحيق في
وريدك كالبنج
وأنت تتنفس صباحا
وتتطلق الأفراح. صراحا
وتطعمك ضد الأنين
يختفي الوجع الأساسي
وينتهي الالم السياسى
وتصعدك كل الأماني
ونشوة الريد المباحة
في عيون زول اسمراني
بين وريدك والبساتين
جوة
بتخت الكراسي
ومنتظر جية خريفك
والبنات الازهرن
جوة
في
صباح
الفساتين
البساتين
