نجم الاهلي يطالب بالتحقيق الفوري مع مجلس الخطيب وانقاذ النادي

كتب : خليل ابو العلا
كابتن محسن صالح نجم الاهلي فتح نيران غضبه علي الخطيب ومجلسه ولاعبي الفريق والجهاز الفني اثناء استضافته عبر راديو أون سبورت بعد خسارة الأهلي بثلاثية كارثيه من بيراميدز
وقال هو موسم كارثي، لم يتعود النادي الأهلي وجماهيره على هذه النتائج وهذا المستوي وعلى هذا الخروج من جميع البطولات بدون أي إنجازات

• يعني الحدث كبير أن يكون رد الفعل كبير، مـاينفعش إن إحنا إيه نهادن ونهدي وبعدين الأمور يعني تمشي ونخش بقى بدوامات تانية

• لا بد من الحلول الجذرية التي أدت إلى وصول الفريق إلى هذا المستوى وهذه النتائج؛ يبقى لا بد من البدء فوراً في التحقيق وتحديد الأسباب لهذا الانهيار الإداري والفني ومعرفه المتسبب بدأ من المجلس ووضع حلول سريعه ،

• إذا كان العلاج يتطلب استغناء أو بيع بعض النجوم اللي لم يظهروا بأي مستوى يؤهلهم للعب للنادي الأهلي.. للبيع مفيش مشكلة، ونعود مرة أخرى للتعاقد مع لاعبين آخرين أفضل

• لكن لا بد أن نغير طريقة الاختيار؛ إحنا عايزين نعرف مين اللي جاب الناس دي؟ يبقى لا بد أن يكون فيه تحقيق. مين اللي عمل عقود مع الناس دي؟ يبقى لا بد أن يكون فيه تحقيق. وبالتالي نوضع الحلول المناسبة

• أنت محتاج دلوقتي إنك أنت يعني مش هقدر تقول إقالة المدرب لأنك أنت يعني هتكلف نفسك أكتر وأنت أصلاً كدة كدة خارج البطولات، هم التلات ماتشات اللي فاضلين ويمشي..

• خليه يقعد وحدد اختصاصاته شوية، قلل اختصاصاته، خلّي المساعد المصري يدخل يتكلم معاه أو يتدخل في التشكيل أو كذا ويقوله استريح أنت بقى شوية ويدير المباريات المتبقية

• لازم تغير (السكاوتنج) اللي جاب لك كل دول، لازم يتغير، لازم يتغير الناس دي كلها لا بد إنها تُقال أو تستقيل أو أي حل من الحلول

• ويكون هناك فيه لجنة أخرى يعني متخصصة أكثر إنك أنت ممكن إنك أنت تعمل لجنة فنية من خبراء كبار عندهم خبرات وعندهم يعني فهم جيد للأمور، بحيث إن هم يساعدوا في وضع الحلول أو رسم الخريطة اللي يجب أن يكون عليها الأهلي في الموسم القادم