اغنية قديمة لام كلثوم اسمها ثورة الشك: “اكاد اشك في نفسي لاني اكاد اشك فيك وانت مني”..بيني وبينكم لما اشوف واحد واثق من نفسه وقدراته ومعلوماته ١٠٠% بصراحه _علي رأي المرحوم هيكل_ بشك فيه وبشك في نفسي..
مفيش رأي صح ١٠٠% ولا انسان كمل ..احنا بشر خطائين وخير الخطائين التوابين..كل واحد فينا طوبة صغيرة في البناء الانساني..انسان يكلمك بمفهوم يساري مطلق اوالعكس مفهوم يميني..ديني..ناصري..سلفي..انتهازي ..انا طوبة..الطوبة محتاجة اسمنت ورملة وعامود خرسانة جنبها يسندها..
( واحد من اخوانا المتزمتين دينيا ح يقول لي: مافرطنا في الكتاب من شئ..انا مصدقك.. بس هل تفكيرنا _وهو فعل انساني_ للكتاب: واحد ..لو كان التفكير والتفسير واحد لما اختلف الصحابة المبشرين بالجنة فيما بينهم وتقاتلوا وقتلوا )
الواحد منا كثيرا مايختلف مع نفسه في نفس الموقف واللحظة..ماتراه عينك قد يختلف مع تسمعه اذنك..مايحسه قلبك..ماتدركه بعقلك..لهذا انا مع الست ام كلثوم اكاد اشك في نفسي !
ومع الموسيقار عبدالوهاب وهو بيقول: قلبي بيقول لي كلام وعنيا شايفه كلام والناس بيقولوا كلام !!
نرجع لموضوعنا : علي المستوي السياسي..اختفت معظم مايسمي انظمة حكم شيوعية لانها كذبة كبيرة ادت لديكتاتوريات بغيضة باسم الطبقة العاملة..الانظمة الراسمالية الغاشمة تكاد تختفي من بلدان منشاها ويتم تصدير نسخها الرديئة لاوطان التخلف واللصوصية والزعماء الملهمين..
الطبقات العاملة والاكثر احتياجا تحميها حرية المعرفة ..الشفافية التامة..النقابات القوية..الاحزاب الفاعلة..الانتخابات النزيهة..حقوق التظاهر والاجتماع..التعليم والتدريب الجيد..قوانين الرعاية الاجتماعية وهكذا..
علي مستوي الفكر الانساني تكاد تختفي الحدود الفاصلة بين العلوم الاقتصادية والعلوم الاجتماعية والسياسية وعلوم البيئة والجغرافيا والسكان والبحوث العلمية لأن كل المواطنين والسكان في سفينة واحدة هي سفينة الوطن وكل العلوم موجهة لخدمة سيد واحد هو سيدنا المواطن البسيط المالك الاول والوحيد للوطن وفي النهاية هو ربان السفينة..
بلاد العقل الواحد والرأي الواحد والفكر الواحد والصفا والانتباه هي الجحيم فليرحمنا الرحمن ..
