أنس دنقل يكتب :صعيدي في الزمالك!!

مؤخرا..سمعت بوفاة ممثلة لبنانية اسمها ” نادية ارسلان”..الاسم اعاد لي ذكريات قديمة.. مايقارب الخمسين عاما..
اوائل سبعينات القرن الماضي..مجندا بالقوات المسلحة.. استدعيت لدورة تدريبية بالقاهرة صحبة زميل فاضل من محافظة أسوان..
كلانا غرباء بالمدينة ..في القطار ..أخبرت صديقي بعزمي النزول بأحد فنادق الدرجة العاشرة
( كويسه ورخيصه وبنت ناس..تحس انك قاعد وسط أهلك وناسك عكس الغربة بفنادق الدرجة الاولي !!)..
صديقي بورجوازي متطلع ( علي رأي اخوانا اليساريين )..لابس بدلة ضابط احتياط ..فاكر نفسه المشير الجمسي ..يصيح مستنكرا :
_ ازاي ؟ احنا ظباط.. ازاي ننزل في لوكندات العتبة ولا الحسين ؟؟
ارد :
_يابن عمي..مش عيب..ده شيخ غفر بلدنا _ اللي هوه شيخ غفر بلدنا علي سن ورمح تتهز له شنبات _ بينزل في لوكاندة الكلوب الزينبي بالسيدة..احنا مش احسن من سعادته..فندق مش اي كلام..ميه ونور..الليلة في ب 12 قرش.. قرش ينطح قرش !!
صديقي أخبرني بسر اصراره : الباشا.. عم سيادته.. عمدة الزمالك : اهم شخصية في حي الزمالك !!
الزمالك ايامها.. زمالك..اجمل حي في العالم العربي ..
(المهندسين لسه ع المحارة ..مدينة نصر صحرا !!)
_ عمي.. محدش يقدر يخالف له أمر ..مين يقدر يدخل او يطلع من الزمالك .. الا بأمر عمي!!..” عمي اللي عليه الشور والقول”!!
كنت اسمع ايامها عن فيلا ام كلثوم في الزمالك..تخيلت عمه الدكتور الحفناوي جوز الست او حسن عامر رئيس نادي الزمالك.. موسيقار الاجيال عبدالوهاب!!
ماعلينا..ركبنا ميني باص رقم 13 من ميدان الفلكي بباب اللوق للزمالك .. نص تذكرة عسكرية بتعريفة ..هبطنا بشارع محمد مظهر بجوار منطقة السفارات..
عمارة ضخمة..دكة بدون مسند..يجلس عليها حافيا..سعادة الباشا السفير.. عم الباشا صديقي: بواب العمارة!!
بعد الترحيب والشاي واخبار البلاد والذي منه..
_يللا اطلعوا فوق استريحوا..
بالاسانسير..صعدنا الدور التالت..بمجرد فتح الباب طالعتنا صورة بالألوان..بالحجم الطبيعي للفنانة اللبنانية الصاعدة / نادية ارسلان
( كنت أشاهد صورها بمجلة الموعد اللبنانية..يرأس تحريرها محمد بديع سربيه )..
لاطرح سؤالا: _دي شقة الفنانه؟!!
_ ايوه..بس مسافره لبنان..
_ طيب والافندي بتاعها ؟
_ سافر النهارده الخليج..
( ايامها كانت سياحة النفط الخليجي في أوج ازدهارها..عشان تاكسي يقف لك لازم تكون لابس عقال ودشداشة..الطلب مرتفع علي الغلمان والنسوان.. الغلمان أولا..!! )
_ طمنتني ياعم الحاج..
الصعايده والبي بي!!
خلي بالك معانا..احنا الصعايدة بعد اي سفر بالقطر للقاهرة _20 ساعة تقريبا_ اول نشاط انساني نمارسه ..الذهاب لدورات المياه (الكنيف)؟؟
دايما كرما ..نحب القاهرة..بلدنا.. حبيبتي يا مصر.. ننفع القاهرة بشئ جميل من ريحتنا الحلوه ..عبق تاريخ وتراث الصعيد الحلو !!
سألت عن بيت الراحة ..
أشار مولانا لمكان هواه يرد الروح .. جنه..مرايات شمال ..يمين ..افتكرته صالون حلاقة من بتوع أكابر البندر ..او مكتب سعادة الباشا المأمور!!
وسط المكتب.. ماجور عجين كبير .. رخام ابيض..قلت :يمكن انجر رز بلبن ..مرات العمدة مطلعاه القرافة رحمة ونور علي روح المرحوم العمدة او ندر لأولياء الله الصالحين !!
طلعت أجري.. اخد صحن رز بلبن !!
طلع البعيد اختراع جديد اول مرة اشوفه..نزل الزمالك.. اسمه (كابينيه افرنجي)..تقعد عليه ..تدلدل رجليك وتسيب نفسك ع الآخر و…بس.. تلف ايدك.. تجري من تحت اللامؤاخذه الأنهار..شئ لايصدقه عقل..حد عاقل يشخ ع النعمة دي!! سبحانه علم الإنسان مالم يعلم !!
( ايامها كانت الكهربا والميه مادخلتش قري الصعيد.. الذهاب لدورات المياه في بلادنا ..طقوس وبروتوكولات شاقة لايقدر عليها الا علية القوم..ذوي بأس عظيم !!
عامة الشعب أمثالي وامثالك ..كفايه عليك زلطة في خرابةاو الهواء الطلق !!
العمد وأعيان البلاد.. إجراءات روتينية شديدة التعقيد والبيروقراطية ..تستوجب مجهودات وتنسيق أمني علي أعلي مستوي كما يلي :
1- غفير لتشغيل الطلمبة.،تزويد جلبتها ببعض الماء ..لان الطلمبات في الصعيد بسبب الحرارة والجفاف..تشحط مما يستوجب التليين !!
2- غفير لملئ الابريق النحاس بالماء وتوصيله للادبخانه ..
3- غفير لتوفير علبة سلمون فارغة صالحة ..بعد تسوية حوافها المدببة لتلافي حوادث الطريق الدامية من ثم تسهيل نقل المياه من بوز الابريق لمناطق التلوث الحدودية !!
4- غفير لرفع وإزالة آثار العدوان الثنائي..بول وبراز )
المهم: خلصت احلي شخة في حياتي..مقارنة بالشخ علي الطريقة الصعيدية مقرفصا ركبك مثل قرد قطع حتي يجي لك فك في الرباط الصليبي !!
لافاجئ بعدها بحوض طلمبة يساع خمس جاموسات وبقرة..حواليه علب ملبن ..جبنة نستو ..حلاوة طحينية..مربي.. زبادي..فزلين.، كل مايحبه قلبك !
–ايه ده ياعم الحاج ؟؟ قال : ده بانيو حموم ..استغفر الله العظيم..رغاوي بيضا وصفرا ..حاجة تنزل ميه سخنه..تانية تنزل ميه بارده..شغل قلة أدب!!
استعنا ع الشقا بالله..سخن الترعة ياولد ..ازلط الخلقات..اغطس قبل مايسمع حضرةعمدة بلدنا يقدم استقالة ولا إجازة بدون مرتب وييجي يشتغل عمدة في الزمالك جنب الباشا ابو المرحوم عم الباشا صديقي ويضايقنا ف عيشتنا!!
خلصت الحمام..لبست روب سمو الامير..لفيت بشكير المدام حوالين دماغي تشبها بنجمة الجماهير ايامها ..نادية الجندي في أفلامها..لسه طالع ..شفت التلاجة..دي قصة تانية..مش تلاجة ..دي غرفة سلاحليك بغفرها بعامل تليفونها !!
في تلك الايام..التفاح الامريكاني الاحمر..كان مستورد..لانراه الا في يد الممثل محمود ياسين يقطمه.. كرمز لممارسة الجنس في افلام حسن الامام.. اكلته..قارف.. بدون غموس وحياتك !!
ذهبت لاستريح..افاجأ..بصديقي الباشا ابن اخو الباشا عمدة الزمالك..شرب كل أنواع الخمور الموجودة بالتلاجه..خلط الويسكي ع البراندي ع البيرة ع السفن اب.. لبس افرول الميدان والشدة..
ف التلاجة واحدة شمام كبيرة ..قسمها نصين..لبس نصها خوذه..كبسها في دماغه !!
صفا..انتباه..يلف حوالين صورة العسل..يؤدي التحية العسكرية.. ينادي لليمين انظر..للشمال انظر..شوية طلع البلكونة ينادي ع السكان : نظم الخطوة ياعيل انت وهوه!!
سكان الزمالك علية القوم ينادي عليهم !!
خفت الموضوع يوسع..حد يبلغ الشرطة العسكرية..ايامها مفيش في الجيش ياامه ارحميني ..ابن الكلب يجيبها لي!!
بشويش..لبست هدومي..شنطتي علي كتفي وفكيك..
تاكسي ب 7 قروش ..سيدنا الحسين يا اسطي !!
( سواق التاكسي وصل زبون خليجي الزمالك وراجع فاضي !)
لوكاندة الكلوب العصري..خان جعفر..ناسنا واهلنا..عيال عمنا !!
حودت علي مطعم العهد الجديد اول شارع الموسكي :طاجن فتة كوارع ب 5 قروش.. واحد رز بلبن من عند المالكي في ميدان الحسين: ب 3 قروش..
بس بصراحة..الزمالك والنضافة حلوه !!! الله يرحمك ياكوكب الشرق..بس احلي شخة واحلي حموم في حياتي حتي تاريخه اعلاه !!