- انا سيناوى ومراعى القرف اللى الجيش فيه بس ده لايعنى انى اتبهدل فى الكماين وانا داخل سيناء لمجرد ان عربيتى نمرها سيناء ويعدى القاهرى ، مش معقولة اكون صاحب الارض وعسكرى يقلى انت رايح سيناء ليه او راجع منها ليه بكل قرف رغم انى بطاقتى سيناء، غيرى بينزلوه من عربيته ويخلوه يرقد ، بس عزيزى فى البوست ده قررت انى اصحح شوية مفاهيم عندك
١- قالولك السيناويه خونة وبتوع اسرائيل نسبة ٩٠٪ من الجواسيس فترة الحرب وبعدها كانوا من اهل الوادى مش من سيناء وظباط جيش ودبلوماسيين مش بدو
٢- قالك مبيحبوش مصر ، تعالى اقلك فترة الحرب اسرائيل جمعت مشايخ سيناء وكبيرهم الشيخ (سليمان الهرش) مع وفد امريكى وقالولهم اعلنوا استقلال سيناء واحنا هنعملكم دوله ، طلع الشيخ سليمان الهرش فى مؤتمر صحفى والاعلام الامريكى. واعلنها ان سيناء ارض مصرية ، ولولا السيناوية كانت طابا ضاعت بالتحكيم لان البدو هما اللى ساعدوا مصر فى معالم الارض
- ٣- قالولك جبناء، انت فين من الشيخة فرحانة رحمها الله اللى كانت بتجمع معلومات ، ولا المجاهد محمود السويركى اللى دمر شبكات الاتصال فى قطاع شمال سيناء وتم اسره ١٥ سنة ، انت تعرف مجاهد اسمه الشيخ(جديغ) ده حتى اللحظة اسير ده اللى دمر مطار ابو رديس اثناء العبور وده اللى صور اول صورة للضربة الجوية فى سيناء اللى انت فرحان بيها ، اقلك ايه ولا ايه
٤- انت عارف اثناء ثورة يناير عساكر وظباط الشرطة المسئولين عن تامين سيناء وحدودها سابوا خط الحدود وجريوا يوم ٢٨ يناير اه حدودنا مع اسرائيل واللى وقف مكانهم السيناوية
- ٥- قالك تجار مخدرات نسبة ٩٠٪ من المخدرات فى مصر هى بودرة وحشيش وبراشيم ودول حضرتك عمرهم ما اتهربوا من سيناء لمصر وشوف قواضى الجلب والاتجار هتلاقيهم من سكان الدلتا والصعيد زى عزت حنفى وبتاع القلبوبية ومدينة السحر والجمال بذمتك اخر مرة سمعت عن حاجة زى دى فى سيناء امتى ، فعلا فى سيناء تجار مخدرات بس حضرتك بيخدوها من القاهرة ويدخلوها اسرائيل وده ممكن تفول عمل وطنى
٦- قالك بيتعاونوا مع الارهابيين انت متعرفش ان فيه من ابناء سيناء عملوا مليشية مسلحة لمساعدة الجيش ، طيب تعرف ان مات ٥٠ مواطن سيناوى مدبوح عشان بيتعاون مع الجيش خلال سنة بس ، تعرف انهم سابوا ارضهم وارض اجدادهم وتاريخهم عشان الجيش يعرف يحارب
٧- قالك بيحقدوا عشان معندهمش تنمية وموارد، انت متعرفش ان ان٨٠٪ من عائد السياحة جاى من شرم ودهب وطابا، تخيل اخدتم ارضهم وبنيتوا فنادق وعدد العمال السيناوية لايتجاوز ١٪ عرفت مين الحرامى
8- احنا يا ابنى الارض المباركة اللى ربنا لما حب يتجلى من السماء ويكلم سيدنا موسى تجلى على جبل الطور اللى اقسم به (والتين والزيتون وطور سينين وهذا البلد الامين ) لما بارك المولى المسجد الاقصى قال (الذة باركنا حوله ) …احنا البركة يا ابنى اللى فى مصر
فياريت وانت بتكلم سيناوى تحترم نفسك عشان محدش دفع فراتير زيينا
