يسألوني شكثر لميت صحبان
ويحسدوني على الكثرة القويه
وأنه ربعي كثر بس شوك عاگول
شما الزمهم يجرحوني أديه
يذموني شقه من انه موجود
بغيابي الذم عليمن شالقضيه
طعنهم بالحجي وجه وگفه زرار
الما يرهملي هم رهمو عليه
أحس بگلوبهم من امر ضيگات
شتظن بيوتهم توسع أليه
أشوف عيونهم من اجي مهليات
لجن بگلوبهم ضمولي أذيه
واحدهم لسانه أعزفله بس ناي
من حلگه يتلولح جنه حيه
و أنه موجود يمهم أو مموجود
بكل الأحول دوم الحجي بيه
أذا طاري أسمي مر وماكو موضوع
الطعن بالأسم مو بس عالهويه
ضيعت بحياتي سنين وسنين
اماشيهم و أكولن هاي هيه
يطعنوني وأگولن يله بالريش
الطعن بالشاعر يضخ شاعريه
و أجاملهم و أكول تعدي وتهون
وهنت يمهم وما نرهم سويه
و أعض أصبع ندم منهم وتنعاد
لحد ما صبحت خلصانه أديه
خناجرهم لهسه تزور مگفاي
ينطي مراد وتزورو خطيه
تحسدوني عليهم عندي صحبان
ولا بيهم صديق و أخو أخيه
بيضه وجوهم بس سوده الگلوب
دخان الجگاره اليطب ريه
شگد فييتهم من جانت شموس
الشمس لاحتني محد جاب فَيَه
ولون ماشيت ملك الموت للموت
أحن من ربعي هم يطلع عليه
ومع كل الذكرته مقصر هواي
لذلك راح أختم بأبوذيه
أنه أكبر من جمعهم.. رُبعي من هم
وحرت بيهم طبعهم.. رَبعي مَن هم
مثل أصحاب مسلم.. رَبعي منهم
نسخه محدثه ومتفصله أليه.
