شايفاها فيك …..بقلم أميره مهران

شايفاها فيك
قدام عينيا بتشتريك
مليان ريحتها
عينيك دى بيتها
قصادى بتدور عليك
بتقولى قلبى ما عشقش غيرك
و انا عارفه انه ما عشقش غيرها
بتقولى شوفى قلبك دليلك
و انا شايفه قلبك ليها و دليلها
قولى الحقيقة دى بديلة ليا
و لا انت بتكلم بديلها
مش قادرة ابص من تانى ليك
شوفت الحقيقة باينة فى عينيك
طب قولى يعنى ازاى هاصدق
ازاى هامد ايديا وقت الضعف اتسند عليك
ما تحلفليش انا عارفه
و مش محتاجة تحلفلى
ده وجعى و بس انا حاساه
ما فيش غير جرحى ينزفلى
و قدامى الطريق هامشيه
لوحدى مالكش عندى مكان
ما تسألنيش يهم فى ايه
سؤالك انت كنت امان
و دلوقتى بقيت الخوف
بقيت زى الوجع مألوف
ما توصفش الخيانة حروف
ما يمسحش الألم نسيان