1 – السادة الأطباء ملائكة الرحمة قرروا – ضمن قراراتهم اليوم – الإمتناع الإضطراري عن العمل ( إسم الدلع للإضراب عن العمل ) في حالة حدوث أي إعتداء من أي شخص على أي طبيب في أية منشأة طبية !!! … يعني حضرتك لو متغاظ من واحد صاحبك عيان في مستشفى روح اتخانق مع طبيب في المستشفى دي ، هو وزمايله هيعملوا إضراب وصاحبك هيموت .
يا ترى الأطباء لما بيعملوا إضراب عن العمل في المستشفيات الحكومية اللي بيشتغلوا فيها ، بيعملوا كمان إضراب عن العمل في العيادات والمستشفيات الخاصة … بالطبع لا ، علشان الطبيب لو أضرب عن العمل في المستشفى الحكومي طول السنة هياخد مرتبه عادي ، لكن لو غاب ساعة عن المستشفى الخاص هتتخصم منه ، ولو اتأخر شوية على العيادة هيطير منه زبونين تلاتة ، وبدال ما يرجع أخر الليلة بألفين جنيه ، هيرجع ب 1800 !!! .
